بعد رؤية ما يحدث من إضرابات غريبة و
إعتصامات أغرب , أيقنت أن الثورة لم تعد لشعب مصر شبابه فقط بل رجعته اللفه.
الطفل الرضيع فقط هو من يجلس لا يفعل شيء سوى
الصراخ كلما احتاج شيء و لا يفعل غير ذلك ليجد من يطعمه و يغيرله و يداديه و
يلاعبه , هذا فعلاً ما يحدث.
كل الفئات تصرخ لأمها الحكومه و لا تفعل ما
عليها من عمل و مسئولية و عايزه ماما توكلها و تشربها و تغيرلها البامبرز كمان ,
يعني الحكومة غير اللي شايلاه من زوجها السابق مبارك و قرفه و أفعاله سايبلها
عياله كمان يطلعوا عين أمها و عايزين ياكلوا و يشربوا و تغيرلهم البامبرز على
الجاهز ما هي خدامة أبوهم مبارك و لازم تتحمل عمايله لوحدها و لازم تضرب الأرض
تطلع بطيخ , و لو افترضنا ان أمنا الحكومه إستعانت بكل مرضعات مصر و العالم علشان
توكل عيال مبارك و نتيجة أعماله السودا و خاصة بعد فتوى إرضاع الكبير , هتجيب منين
بامبرز يكفي كل العيال دول و قذاراتهم.
ليه قولت عيال مبارك , علشان هوه اللي عودهم
على كده إنه علمهم و سقاهم إن الأقوى بياكل الضعيف و ان الفساد و الإنحلال الخلقي
هو الأساس و عدم الدين و النخوة و المروءة و عزة النفس.
أغرب ما تم اليوم هو رفع سائقي و عمال النقل
العام لمطالبهم بصرف الحوافز بأثر رجعي من 51 سنه , يعني اللي طالع على المعاش عينوه و هو عنده 9 سنين و اللي عنده خمسين سنه عينوه و هو في بطن أمه , حد يفهمني
الفزوره دي بقى من 51 سنه إزاي بس ؟؟؟
البني آدم لا يملأ عينه غير التراب يعني لو
وافقت على أول المطالب هتوصل معاهم إنهم ممكن يفتحولك و يردوا عليك و انت موديلهم
مرتبهم البيت بلا عمل و بكده يبقوا بيتفضلوا عليك و ما فيش شاي كمان.
فعلاً موظفين و عيال مبارك و ما يحسش بكده
غير اللي طول عمره قطاع خاص و عارف المسئولية و اشتغل بجد , مش موظف و إبن مبارك , يعني إيه دكتور يضرب و يموت و يضيع حياة الناس أو مدرس يضرب و يضيع مستقبل أولادنا و لا سائق نقل عام يضرب و يوقف البلد و يعطل مصالح الناس , إتقوا ربنا و اعقلوا قبل ما تخربوها و ما تسمعوش كلام اللي عايزين يخربوها.
|